လှိုင်း

ဘဝကို...
မိုက်မိုက်မဲမဲ (ရောင့်ရဲ/ရိုးသား/သမားရိုးကျ/သာယာ) မိခဲ့တော့လည်း
ခက်ခက်ခဲခဲ (အားတင်း/ရုန်းကန်/ပေးဆပ်) ရတာပေါ့
တကယ်တမ်းပြောရရင်တော့
ဘဝဆိုတာ...(ဂငယ်ကွေ့) ကွေ့လို့မရတဲ့အရာ။   ။

ပင်နယံ

မင်္ဂလာပါ...
မင်္ဂလာနံနက်ခင်းပါ...
မင်္ဂလာနေ့လည်ခင်းပါ...
မင်္ဂလာညနေခင်းပါ...
မင်္ဂလာညချမ်းပါ...
နေထိုင်ကောင်းပါရဲ့လား...
ဒါကဒီလိုရှိပါတယ်...
ဟိုဟာကဟိုလိုရှိပါတယ်...
ကျေးဇူးတင်ပါတယ်...
နောင်လည်းလာခဲ့ပါ...
အာရုံလာလာမလာလာ
အကျင့်ပါသလိုဖြစ်နေတာက
အပြုံးမျက်နှာနဲ့ချိုသောစကား
ကြာလာတော့လည်း...
ငြီးငွေ့မိတယ်ဆိုတာ
ဘယ်သူ့ကိုရင်ဖွင့်ပြရမလဲ
အဆင်ပြေပြေမပြေပြေ
တလတခါအိမ်ကိုငွေပို့နိုင်ဖို့အတွက်
ခံစားချက်တွေကိုမျိုသိပ်
အောင့်အည်းရလွန်းလို့
တခါတခါမှာ...
လူဆိုတာတောင် ကိုယ့်ကိုကိုယ်မေ့နေလေရဲ့
ဖြစ်သလိုနေ...
ဖြစ်သလိုစား...
ဖြစ်နေရတဲ့ဘဝကို
နားလည်အောင်လည်းမပြောချင်တော့ပါဘူးလေ
ဖြစ်သမျှအကြောင်းအကောင်းလို့မှတ်
ရှေ့ဆက်...မနက်ဖန်များစွာကျန်သေးတယ်။   ။

နှောင်း

ရည်စူး​ပြီး​ဖူး​ခဲ့​ပေ​မယ့်
ချိန်​ခါ​သင့်​မ​ပွင့်​တတ်​ခဲ့​တော့
ပန်းဦး​လည်း...လွဲ​ခဲ့​ရ​ပြီ​မေ
ရင်​တ​ခု​လုံး​ဝေ​နေ​အောင်
အလွမ်း​တွေ​ပွင့်​ခဲ့​ပေ​မယ့်
မေ​မ​သိ​ခဲ့​တော့​လည်း
နွမ်း​ပါ​စေ...
ကြွေ​ပါ​စေ...
ရှိ​ပါ​စေ​တော့...မေ
ပွင့်​ရာ​က​ကြွေ
ကြွေ​ရာ​က​နွမ်း
ဒါ​ပေ​မယ့်​လေ
တိုက်ဆိုင်​တတ်​တဲ့​အခါ​တိုင်း
ဟိုး​အရင်​က​အကြောင်း​တွေ​ကို​တော့
ရိုး​ရိုးသား​သား...လွမ်း​ပါ​ရ​စေ
လွမ်း​နေ​ပါ​ရ​စေ...မေ။   ။

   ''အချစ်​ဆို​တာ''
တ​နေ့⁠နေ့​တ​ချိန်⁠ချိန်​ကို​စောင့်စား​ရင်း
ရင်​တ​ခု​လုံး​ဝေ​နေ​အောင်​ပွင့်​ခဲ့​ရ​တဲ့​အလွမ်း
ပြော​ဖို့​သိမ်းထား​ခဲ့​တဲ့​စကား​တွေ
ထင်မှတ်​မ​ထား​တဲ့​အချိုး​အကွေ့​တ​ခု​မှာ
ပြော​ခွင့်​မ​ရှိ​တော့​တဲ့​အခါ
မ​ခြွေ​ပေ​မယ့်​ကြွေ​ခဲ့​တယ်။   ။

အတိုအစများ

ဘဝကို တခါပြန်စခွင့် ရှိခဲ့ရင်တောင်မှ ဘယ်နေရာကပြန်စရမယ်မှန်း ကျနော်မသိဘူးမေမေ။ ရိုးသားဖြူစင်တဲ့ ကလေးဘဝလား၊ လန်းဆန်းတက်ကြွတဲ့ ဆယ်ကျော်သက်အရွယ်လား၊ အရွယ်ရောက်ကာစ ကိုယ့်ခြေထောက်ပေါ် ကိုယ်ရပ်တဲ့အချိန်လား ကျနော်ဘာကိုရွေးရမှာလဲမေမေ။ သေချာတာတခုကတော့ ကျနော်ရိုးသားချင်တယ်၊ ကျနော်ရဲရင့်ချင်တယ်၊ ကျနော်ဖြူစင်ချင်တယ်၊ ကျနော်တက်တက်ကြွကြွရှိနေချင်တယ်။ မစ္ဆိရစိတ်ကင်းကင်းနဲ့ ဘဝကိုတည်ဆောက်ချင်တယ်။ ဒါပေမယ့်လည်း မေမေရယ်၊ ဖြစ်ပျက်သွားတာတွေက သိပ်မြန်တယ်။ သိပ်ကိုမြန်ခဲ့တယ်။ ရွေးချယ်ခဲ့သည်ဖြစ်စေ၊မဖြစ်စေ ကျနော်ပျိုးခဲ့တဲ့မျိုးကို ကျနော်ရိတ်သိမ်းရမှာပေါ့မေမေ။စိတ်ပျက်တယ်ရယ်လို့ မဟုတ်ပေမယ့် မကျေမနပ်တော့ ဖြစ်မိတာပေါ့မေမေ။လက်ရှိဘဝကို နေတတ်ဖို့၊ ကျေနပ်တတ်ဖို့ ကျနော်ကြိုးစားနေပေမယ့်။တကယ်တမ်းကျတော့ ကျနော်မရင့်ကျက်သေးပါဘူးမေမေ။

ချင်

ချင်
ချင်ကိုက်တယ်
ချင်တွေကိုက်တယ်
ငယ်ငယ်တုန်းကလည်း...ချင်တွေကိုက်တယ်
ဆယ်ကျော်သက်မှာလည်း...ချင်တွေကိုက်တယ်
အရွယ်ရောက်လာတော့လည်း...ချင်တွေကိုက်တယ်
မိဘအရိပ်မှာနေတုန်းကလည်း...ချင်တွေကိုက်တယ်
ကိုယ့်ခြေထောက်ပေါ်ကိုယ်ရပ်တော့လည်း...ချင်တွေကိုက်တယ်
အရင်တုန်းကလည်း...ချင်တွေကိုက်တယ်
အခုလည်း...ချင်တွေကိုက်တယ်
နောင်လည်း...ချင်တွေကိုက်နေဦးမှာပဲ
ဪ...ချင်...ချင်...ချင်...
တဘဝလုံးစာကိုကိုက်တဲ့...ချင်။   ။

ကျနော်​တို့ ပျော်​ကြ​တယ်

အပျော်​တမ်း ကဗျာ​ရေး​တယ်
အပျော်​တမ်း သီချင်းဆို​တယ်
အပျော်​တမ်း လက်​ဝှေ့​ထိုး​တယ်
အပျော်​တမ်း ဖဲကစား​တယ်
အပျော်​တမ်း တောင်​တက်​တယ်
အပျော်​တမ်း ရုပ်​ရှင်​ရိုက်​တယ်
 အပျော်​တမ်း ဘော်​လုံး​ကန်​တယ်
အပျော်​တမ်း အရက်​သောက်​တယ်
အပျော်​တမ်း နှင်း​လျော​စီး​တယ်
အပျော်​တမ်း ရည်းစားထား​တယ်
အပျော်​တမ်း ကား​ပြိုင်​တယ်
အပျော်​တမ်း နိုင်ငံ​ရေး​လုပ်​တယ်
အပျော်​တမ်း လိင်​ဆက်ဆံ​တယ်
အပျော်​တမ်း စစ်​မှု​ထမ်း​တယ်
အပျော်​တမ်း နွား​ရိုင်း​သတ်​တယ်
အပျော်​တမ်း ဂ​ဏာန်း​တွက်​တယ်
အပျော်​တမ်း မူး​ယစ်​ဆေး​သုံး​တယ်
အပျော်​တမ်း အမဲ​လိုက်​တယ်
အပျော်​တမ်း ပ​ဟေ​ဠိ​ဖွက်​တယ်
အပျော်​တမ်း ပဉ္စ​လက်​ပြ​တယ်
အပျော်​တမ်း လူသတ်​တယ်
ဟုတ်ကဲ့...ဟော့​ဒီ​လောက​ကြီး​ထဲ​မှာ ကျနော်​တို့ပျော်​ကြ​ပါ​တယ်။   ။

အလွမ်း​အကြောင်း​ရေး​တဲ့​ကဗျာ

နေသာလို့လွမ်းတယ်
မိုးရွာလို့လွမ်းတယ်
နေ့မို့လို့လွမ်းတယ်
ညမှောင်လို့လွမ်းတယ်
ပူလို့လွမ်းတယ်
အေးလို့လွမ်းတယ်
သတိရလို့လွမ်းတယ်
ရိုးရိုးသားသားလွမ်းတယ်
လွမ်းချင်လို့ကိုလွမ်းတယ်။

ကဗျာ

ကဗျာ​ရေး​သူ​နဲ့
ကဗျာ​ဖတ်​သူ​ကြား
ကဗျာ​တွေ ခြား​လာ​တယ်
ကဗျာ​ရေး​သူ​ဟာ​ကဗျာ​ဆရာ​ဖြစ်လာ​ပြီး
ကဗျာ​ဖတ်​သူ​ဟာ​ကဗျာ​စား​သုံး​သူ
ကဗျာ​ကို ကဗျာ​နဲ့​ပို့ချ
ကဗျာ​ကို ကဗျာ​နဲ့​တော်​လှန်
ကဗျာ​ကို ကဗျာ​နဲ့​ထုတ်​လုပ်
အရှေ့၊အနောက်၊တောင်၊မြောက်၊အလယ်
အတိတ်၊ပ​စ္စု​ပန်၊အနာ​ဂါတ်
ကဗျာ​တွေ စီး​ဆင်း​ခဲ့​ကြ​တယ်
ကဗျာ​တွေ စီး​ဆင်း​နေ​ကြ​တယ်
ကဗျာ​တွေ စီး​ဆင်း​တယ်
ကဗျာ​လို့ သိသာ​စေ​တဲ့​ကဗျာ
ကဗျာ​လို့ မ​ထင်​ရ​တဲ့​ကဗျာ
ကဗျာ​လို့ ဟန်ဆောင်​ထား​တဲ့​ကဗျာ
ကဗျာ​မဟုတ်​တဲ့ ကဗျာ
ကဗျာ​တွေ​ကြား​ထဲ​မှာ ကဗျာ​ဆို​တာ
မ​သိ​စိတ်​နဲ့​ကိုးကွယ်​မိ​တဲ့
တတိယ​မြောက်​ဘုရားသခင်။   ။

အသစ်​တ​ဖန်

မင်္ဂလာ​ပါ။ဘ​လော့​ကို ယူ​နီ​ကုတ်​နှင့် ပြောင်း​ရေး​မည်​ဖြစ်​သော​ကြောင့် အရင်​ဘ​လော့​အား ဖျက်​လိုက်​ပြီး အသစ်​တ​ဖန်​ပြန်​ဆောက်​ထား​ခြင်း ဖြစ်​ပါ​သည်။အရင်​က အဟောင်း​များ​ကို​တော့ FEELING,DREAM,NOTHING တွင်သွားရောက် ဖတ်​ရှု​နိုင်​ပါ​သည်။အားလုံး​ပဲ နှစ်​သစ်​မှာ ကိုယ်၊စိတ်၊နှလုံး ချမ်းမြေ့​ကြ​ပါ​စေ။